بزووتنەوەی ژینا: دەستکەوت و ئاڵنگارییەکانی

بزووتنەوەی ژینا سەرەتای قۆناغێکی نوێی مێژووی هاوچەرخی سیاسیی کوردستان و ئێرانە. یەکێک لە تایبەتمەندییەکانی بزووتنەوەی ژینا دینامیزمی بزووتنەوەکەیە. ئەم تایبەتمەندییە وای کردووە بزووتنەوەی ژینا بە تێپەڕینی کات ڕۆژ لە دوای ڕۆژ زیاتر خۆی بەپێی کەشی سیاسی، تەناهی، ئابووری و کۆمەڵایەتی بگۆڕێت و ڕێگەی نوێی درێژەدان و بەردەوامی بۆ گەیشتن بە ئامانجە فرەڕەهەندەکانی تاقی بکاتەوە. هەر ئەمەیش وای کردووە ئەم بزووتنەوەیە تا ئەم ساتە ڕۆژەڤی نوێ لە کوردستان و ئێران بهێنێتە ئاراوە. بزووتنەوەی ژینا لە کوردستان، ئێران و لەنێو دایاسپۆرای کورد، کاریگەریی قووڵ و بەرچاوی لەسەر سیاسەت و کۆمەڵگای کوردی داناوە و وێدەچێ ئاسۆی گۆڕانکاری و کاریگەرییەکانی بەردەوام بێت. وەک هەموو بزووتنەوەیەکی دیکە، بزووتنەوەی ژینایش کۆمەڵێک دەستکەوتی بۆ کۆمەڵگای کوردی و سیاسەت لە کوردستان هەبووە. هاوکات، دینامیزمی سیاسەت و کۆمەڵگا، مامەڵە لەگەڵ ڕێژیمێکی تۆتالیتێری ڕەگەزپەرەست، کلتووری شۆڤێنیستیی سیاسیی ئێرانی و نەبوونی یەکدەنگی لەنێو سیاسەتی کوردیدا، کۆمەڵێک ئاڵنگاریی جددییان بۆ بزووتنەوەکە ساز کردووە. بەم بۆنەیەوە تەوەری داهاتووی گۆڤاری تیشک تەرخان دەکرێت بۆ دەستکەوت و ئاڵنگارییەکانی بزووتنەوەی ژینا. داوا لە نووسەران و وەرگێڕانی بەڕێز دەکەین لەم بوارانەی خوارەوەدا نووسین و وەرگێڕانەکانی خۆیانمان بۆ بنێرن:

• تەوەری یەکەم: بزووتنەوەی ژینا و گوتاری سەروەریخوازیی سیاسی لە کوردستان؛

• شیکردنەوەی گوتاری سەروەریخوازی: زاراوەناسی، ڕێبازی لێکۆڵینەوە و بیردۆزییەکانی

• سەرەڕۆیی (ئیستبدا)ی سیاسی و سیستەمی ئیتنۆکراسیی سیکۆلاری فارسی

• کاریگەریی بزووتنەوەی ژینا لەسەر هێزە سیاسییەکانی کوردستان

• بزووتنەوەی ژینا و ناسنامەخوازیی نەتەوەییی کورد

• بزووتنەوەی ژینا و کاریگەرییەکانی لە هاوپێوەندیی نەتەوەکان لە ئێراندا

• بزووتنەوەی ژینا و شێوازەکانی کۆنتڕۆڵی دەوڵەت و شۆڤێنیزمی ئێرانی

• بزووتنەوەی ژینا و پەیوەندییەکانی بە بەستێنی مێژووییی شۆڕشی نەتەوەییی کوردەوە

• کاریگەریی بزووتنەوەی ژینا لەسەر بووژانەوەی ناسنامەی نەتەوەکان لە ئێراندا

• بزووتنەوەی ژینا، ئەزموونێک بۆ هاوکاری و هاودەنگی لەنێو حیزبەکانی ڕۆژهەڵاتی کوردستاندا

• بزووتنەوەی ژینا لەنێوان گوتاری هاوبەش و گوتاری ڕەقیبی حیزبەکان و کۆمەڵگادا

• تەوەری دووەم: بزووتنەوەی ژینا و نوخبە و کۆمەڵگە؛

• ڕۆڵی ژنانی نوخبە لە بزووتنەوەی ژینادا

• بزووتنەوەی ژینا و بزووتنەوەی فێمینیستیی ژنانی کورد

• بزووتنەوەی ژینا و بەشداریی ژنان لە بیاڤی گشتیدا

• شیکردنەوەی گوتاری نوخبەی سیاسیی کورد

• نوخبە سیاسییەکان و کۆنتڕۆڵی سەرچاوەکانی دەسەڵات

• نوخبەی سیاسی و بەرژەوەندییە تایبەتەکانی

• ڕۆڵی نوخبەی ئەکادیمی لە بزووتنەوەی ژینادا

• بزووتنەوەی ژینا و مامۆستایانی ئایینی

• کاریگەریی بزووتنەوەی ژینا لەسەر کۆدەنگیی کۆمەڵگای کوردستان

• بزووتنەوەی ژینا و هەڵوێستی حیزبە سیاسییەکانی ڕۆژهەڵاتی کوردستان

• بزووتنەوەی ژینا و کۆمەڵەی دایاسپۆرای کورد

• بزووتنەوەی ژینا و توێژینەوە ڕووناکبیرییەکانی کوردستان

• بزووتنەوەی ژینا و ئۆپۆزیسیۆنی ئێرانی

• نوخبە و پرسی نوێنەرایەتی لە بزووتنەوەی ژینادا

• دۆخی بنەماڵەی شەهیدان، بەندکراوان و بریندارەکانی بزووتنەوەی ژینا

• دۆخی ئابووری و کۆمەڵایەتیی کوردستان لە سەردەمی بزووتنەوەی ژینادا

• داهاتووی بزووتنەوەی ژینا: ستراتێژییەکانی گەشەپێدان و فراوانکردنی بزووتنەوەی ژینا

• تەوەری سێیەم: بزووتنەوەی ژینا و نواندنەوەی لە ڕاگەیاندندا؛

• ڕۆڵی سۆشیاڵ میدیا لە نواندنەوەی بزووتنەوەی ژینادا

• دیمەنە زمانییەکان لە خۆپشاندانەکانی بزووتنەوەی ژینادا

• میدیای دەسەڵاتی داگیرکەر و گێڕانەوەکانی لەسەر بزووتنەوەی ژینا

• دژە گێڕانەوەکان لەبەرانبەر گێڕانەوەی سەروەر(Master narratives) لە بزووتنەوەی ژینادا

• شیکردنەوەی گوتاری میدیای ئێرانی و ڕەهەندە شۆڤێنیستییەکانی

• شیکردنەوەی دەقی مەنشوورەکان و ڕەهەندە شاراوەکانی نەژادپەرەستی

• شیکردنەوەی گوتاری میدیای فارسی لەسەر بزووتنەوەی ژینا

• نواندنی میدیاییی تەلەڤزیۆنە فارسییەکان لەسەر خۆپێشاندانەکانی کوردستان و بەلووچستان

• دەمانێ (دیبەیت)ی میدیایی و شیکردنەوەی وتووێژی تەلەڤزیۆنی وەک ژانرێکی میدیایی

• بزووتنەوەی ژینا و ڕەنگدانەوەی لە جۆرە ئەدەبییەکاندا

• بزووتنەوەی ژینا و نواندنەوە هونەرییەکان

دەستەی نووسەرانی گۆڤاری تیشک

تێبینی: دوایین مۆڵەتی وەرگرتنی وتار و توێژینەوەکان، ١٠ی خەرمانانی ١٤٠٢ی هەتاوی بەرانبەر بە ١ی سێپتەمبری ٢٠٢٣ یە.